एजेण्डा ज्वःलाःपिंलिसे नेवाःतय्सं मोर्चाबन्दी यानाः वनीगुयाकनं हे नेवाःतय्गु रोडम्याप तयार याइगु
नेवाः स्वायत्त राज्यया नितिं आन्दोलन यानाः वयाच्वंगु नेवाः स्वायत्त राज्य मंकाः संघर्ष समिति आवंलि नेवाःतय्गु एजेण्डाय् ज्वःलाःपिंलिसे मोर्चा बन्दी यानाः वनीगु जूगु दु ।
मंकाः संघर्ष समितिं आवंलि नेवाःतय्गु एजेण्डा एकल जातीय पहिचानया आधारय् संघीयता, गणतन्त्र, धर्म निरपेक्षताया सवालय् ज्वःलाःगु राजनीतिक दल, जनजातिया संगठन, जातिय संगठन, छुं नं कथंया खलः पुचः व मनूतलिसे मोर्चाबन्दी यानाः वनेगु तयारी याःगु दु ।
मंकाः संघर्ष समितिइ दुथ्याःगु झिंनिगू घटकया निम्ह/निम्ह अले परिस्थितियात विश्लेशण यानाः रोडम्याप दयेकेगु सवालय् विज्ञ डा. मोहनदास मानन्धर नापं यानाः मक्कं नीन्याम्ह नेवाः न्ह्यलुवात नगरकोटय् वानाः नेवाःतय्गु न्हूगु लापु मालेगु विषययात कयाः जूगु निन्हुयंकंया कार्यशाला गोष्ठिइ उगु कथं सहलह ...जूगु खः धकाः छम्ह नेवाः नेतां जानकारी बियादीगु दु ।
वंगु शुक्रवाः सुथंनिसें शनिवाः तक नगरकोटय् हे च्वनाः देय्या राजनीतिक अवस्थायात कयाः विश्लेषण यायेगु नापं संभावना व नेवाःतय्सं म्हितेमाःगु भूमिकाया बारे सहलह जूगु खः ।
न्हापांगु दिं शुक्रवाः जूगु ज्याझ्वलय् नेवाः स्वायत्त राज्य मंकाः संघर्ष समितिया सचिवालय् कजि मल्ल के सुन्दरं आःया परिस्थिति, कार्यशाला गोष्ठिया आज्जु, संभावना व नेवाःत वनेगु लापुया बारे थःगु विचाः प्वंकादीगु खः । अनं लिपा गोष्ठिइ सहभागी जूपिन्त स्वंगू पुचः पुचलय् दुथ्याका सहलह ब्याकेगु अले थःथःपिनिगु खा तयेगु ज्या जूगु खः ।
अथे हे शनिवाः नं अन थःथःगु खा तयेगु ज्या जूगु खः ।
आःया पस्थितियात विश्लेषण यानाः संभावना कथं संविधानसभाया पुनस्र्थापना, संविधानसभाया न्हूगु चुनाव, गोलमेच सभा, संसदया चुनाव, आयोगपाखें संविधान जारी याइगु, विद्रोह जुइगु, राष्ट्रपतिपाखें कू जुइफुगु नापं मेमेगु विषययात कयाः सहलह जूगु खः ।
उगु कार्यशाला गोष्ठिइ आः छवाःया दुने झिंनिगू हे घटकय् थःथःपिनि दथुइ सहलह ब्याकाः नेवाः स्वायत्त राज्यया नितिं न्ह्याः वनेत रोडम्याप तयार यायेगु लापुपाखे वनेगु तयारी याःगु दु ।See More
No comments:
Post a Comment
Registered हुनु जरुरि छैन Comment as मा Anonymous select गर्नुहोस । आफ्नो नाम ठेगाना र प्रतिकृया लेख्नुहोला...अनि Publish थिच्नुस ।